Reshjet e dendura të shiut “pushtuan” vendin tonë, duke pasuar kështu temperaturat e larta që shoqëruar të gjithë territorin gjatë muajit qershor.
Mjaftuan vetëm disa minuta reshje të dendura dhe disa zona të vendit u përmbytën, duke krijuar vështirësi në qarkullimin e automjeteve dhe këmbësorëve.
Rrugë të ndryshme të kryeqytetit u përmbytën, por probleme nuk u regjistruan vetëm në Tiranë.
Po ashtu, në Lezhë situata u paraqit e vështirë, pasi siç dallohet në pamjet e siguruara, rrugët janë përmbytur nga uji që vërshon mbi to.
E njëjta situatë është regjistruar edhe në Fushë-Krujë, ku tregu i fruta-perimeve u përmbyt, duke vënë në vështirësi tregtarët. Këta të fundit nisën të zhbllokonin vullnetarisht pusetat, në mënyrë që produktet e tyre të shpëtoheshin.
Temperaturat priten të rriten përgjatë kësaj jave, por në fillimin e javës tjetër parashikohet rikthim reshjesh.
Megjithatë, temperaturat do të rriten me disa gradë, pas uljes së ndjeshme të ditëve të fundit./vizionplus.tv/
