Izraelitët kryen operacione ajrore dhe tokësore kundër Hamasit në qytetin e Gazës këtë të premte, duke bërë që dhjetëra mijëra njerëz të largohen.
Në kufirin Izrael-Liban, vazhduan sulmet e Hezbollahut, një aleat i Hamasit, kundër pozicioneve të ushtrisë izraelite, si dhe sulmet e forcave të armatosura izraelite kundër objektivave në Liban. Hezbollahu njoftoi vdekjen e katër prej luftëtarëve të tij.
Operacioni i gjerë ushtarak i Izraelit në Rripin e Gazës filloi pas sulmit të paprecedentë nga Hamasi më 7 tetor. Frika e përhapjes së konfliktit në Liban është intensifikuar pas përshkallëzimit të dhunës në kufirin me Izraelin dhe kërcënimeve nga të dyja palët.
Lufta ka shkaktuar kërdinë humanitare në enklavën e vogël palestineze prej 2.4 milionë banorësh, e cila është shkëputur plotësisht nga bota e jashtme që nga 9 tetori: ka mungesë uji dhe ushqimi, shumica e spitaleve janë jashtë funksionit, lagje të tëra janë shkatërruar dhe 37,765 njerëz janë vrarë, sipas Ministrisë së Shëndetësisë të Hamasit.
Ushtria izraelite njoftoi se kishte kryer një operacion në Shuzaiya, në pjesën lindore të qytetit të Gazës, pas informacioneve për “praninë e terroristëve dhe infrastrukturës terroriste” në zonë. Ushtarët hynë në lagje dhe avionët ushtarakë shënjestruan “dhjetëra pozicione terroriste të Hamasit”.
“Re tymi” u ngritën mbi Shuzaiya pas sulmeve ajrore dhe mortajave, sipas një korrespondenti të AFP. Operacioni nisi dje, të enjten, me zjarr artilerie dhe helikopterësh, si dhe me përplasje mes ushtarëve dhe militantëve. Mbrojtja Civile dhe dëshmitarët okularë njoftuan se ka “shumë të vdekur”.
“Dhjetëra mijëra civilë” janë larguar nga zona, tha Mbrojtja Civile , pas një apeli të ushtrisë që banorët të evakuohen, pasi asnjë pjesë e Rripit të Gazës nuk është e sigurt, sipas OKB-së.
“Mjaft! Ne jemi të shkatërruar. Ne humbëm fëmijët dhe shtëpitë tona dhe vazhdojmë të ikim nga një vend në tjetrin”, u ankua një grua palestineze duke u larguar.
Izraeli tha se një ushtar 19-vjeçar u vra në Gazën jugore, duke e çuar në 314 numrin e ushtarëve të vrarë që nga fillimi i operacioneve tokësore në enklavën palestineze më 27 tetor.
