2 korriku i vitit 1990 është për shqiptarët dita e rrëzimit të murit të tyre të Berlinit. Rreth 5 mijë qytetarë sfiduan diktaturën dhe hynë brenda ambasadave, ngjarje kjo që tronditi ndoshta më shumë se çdo gjë tjetër regjimin komunist.
Në korrikun e 90 në Shqipëri diktatura komuniste dukej ende e fortë, edhe pse në Tiranë kishte mbërritur jehona e shembjes së murit të Berlinit disa muaj më parë apo vrasja e diktatorit Cuashesku në Rumani.
Por revolta e mijëra shqiptarëve të cilët brenda një dite hynë nëpër ambasada duke kërkuar strehim politik për ti ikur regjimit, tregoi se diktatura komuniste nuk mund mbijetonte gjatë.
Shqiptarët e parë në atë dy korrik shkuan në ambasadën greke, të tjerë në ambasadën franceze, italiane e egjiptiane. Momenti më i bujshëm i atij 2 korriku ishte veprimi i Ylli Bodinakut i cili çau me kamion murin e ambasadës gjermane. Bodinaku kishte marrë me vete gruan, dy djemtë si dhe miq e të afërm dhe me kamionin e tipit Skoda hyri brenda ambasadës për të kërkuar strehim politik. Pas tij dhjetëra qytetarë hynë brenda ambasadës gjermane në përpjekje për ti ikur tmerrit komunist.
Me ndërhyrjen e diplomatëve dhe pas disa ditë negociatash edhe me Sekretarin e Përgjithshëm të Kombeve të Bashkuara, Peres de Kuilar, diktatura komuniste u dorëzua dhe lejoi largimin e qytetarëve shqiptarë drejt vendeve në ambasadat e të cilave ata kishin kërkuar strehim politik.
5 muaj më vonë, në 8 dhjetorin e vitit 1990 do të ishin studentët ata që do të ngriheshin në protesta duke rrëzuar pas më shumë se 4 dekadash diktaturën komuniste./vizionplus.tv